ஏமாற்றம்

ஏமாற்றம்தான்
என்றாலும்
தினம் தினம்
எதிர்பார்த்துக்கிடக்கிறேன்

என் ஏமாற்றம்
உனக்கு
அளவிலா ஆனந்தம்
தரும் என்பதால்...

கிருமிகள்

கழிவறைக்குள்
கைகளுக்குள்
வீட்டின் தரையில்
பற்களில்
பளபளக்கும் ஆடையில்
எல்லா இடத்திலும்
எல்லாவற்றிலும்
நிறைந்திருக்கும் கிருமிகள்
அடிக்க தெளிக்க பூசிக்கொள்ள
அந்நிய மருந்து
கிருமிகள் எல்லாம்....?

குழந்தை முகம்

மொட்டை மாடி நிலா
முகம் மறைத்தது மேகத்துள்
குழந்தை முகம் கண்டு

குழந்தை-ஹைக்கூ

மழை வெறுத்துப்போனது
ரசிக்க யாரும் மில்லை
கணினியில் குழந்தைகள்

தூங்கும் குழந்தை -ஹைக்கூ

நீண்டு செல்லும் பேச்சு
ஆடவந்ததை மறந்து
அமர்ந்தே தூங்கும் குழந்தைகள்

சிக்கல்

சிக்கிக் கொள்கிறது
புள்ளியும் மனமும்
அவள் கோலத்தில்.

பைத்தியம்

காணக்கிடைக்கிறார்கள்
அங்கிங்கெனாதபடி
நீக்கமற நிறைந்து
எங்கும்
விதவிதமாய்
பைத்தியங்கள்.

கடவுள் பைத்தியம்
காதல் பைத்தியம்
கட்சிப் பைத்தியம்
காசுப் பைத்தியம்

காட்சிப் பைத்தியம்
கவிதைப் பைத்தியம்
தன் பைத்தியம் உணரா
அடுத்தவர் பைத்தியம்
கதைக்கும் பைத்தியம்

மண் பைத்தியம்
பெண் பைத்தியம்
காலங்காலமாய்
தொடரும் பைத்தியம்

மனப் பைத்தியம்
மாயப் பைத்தியம்
தீர்க்கும் பைத்தியம்
எங்கு உள்ளார்?
தீரும் பைத்தியம்
எங்கு உள்ளது
பைத்தியங்கள்
தன்னைத்தான்
சுற்றும்
பூமி பைத்தியத்தினுள்
எல்லா
பைத்தியங்களும்.

காதல்

துளையிட்ட
வெற்றுப் புல்லாங்குழல்
மெல்லிய
காற்றாய் உள் நுழைந்தாய்
இசை
மழையாய் காதல்

அடியவனுக்கு

அயர்ந்தால்
ஆனந்த சயனம்
நடந்தால்
அற்புத நடனம்
நின்றால்
அடி முடி காணத் தோற்றம்
பொழிந்தால்
திக்குமுக்காடும் அன்பு
சிரித்தால்
பொல்லாச் சிரிப்பு
அடியார்க்கோ ஆண்டவன்
அடி கள்ளி
அடியவனுக்கோ
நீ.

உண்மை(யோ) சொல்

அடுக்கலைச் சப்தம்
திண்ணையில் இருந்து
உள் ஓடித் திரும்பினேன்
பூனை ஒன்று
சாளரம் வழி
குதித்தோட  எண்ணினேன்
அட நாமதானே
அனுப்பி வைத்தோம்
அதற்குள் மறந்து...

சிறிது கழித்து
கூடத்தில் நடைபயில
ரெண்டடிச் சென்று
திரும்பி உணர்ந்தேன்
ஊருக்குப் போனதை.

மீண்டும் ஓசை
மீண்டும் எட்டிப்பார்க்க
நானே நடந்தேன்
அவள்போல் அணிந்து
சரிபட்டு வாராது

எத்தனை நாளைக்கு
நான் உங்க கூடவே
அடைபட்டுகிடக்க
ஒரு நாலு நாள்
எங்கேனும் நிம்மதியா
போக விடுவீங்களா
என்றவளை
ஊருக்கு அனுப்பிவிட்டு
அனுப்பிய ஊருக்கு
மனம் புறப்பட்டது

போகும்போது
சொல்லிப் போனாள்
நீங்க இருக்க மாட்டீங்க
பைத்தியம்
உங்களுக்கு என்மேல்
எப்பொழுதும்

அவள் சொன்னது
உண்மை(யோ) சொல்வீர்