உரக்கப் பேசு

இன்னும் கொஞ்சம்
உரக்கப் பேசு
மேலும் மேலும்
ஓங்கி முழங்கு
அடிவயிற்றிலிருந்து கிளம்பும் ஓசை
முழுதாய் விளங்க
உரக்கப் பேசு
இருக்கும் அரசு
முற்றிலும் செவிடானது என
சுற்றியிருப்பவரெல்லாம்
உணரும் படி
உரக்கப் பேசு

சும்மா ஒரு காதலிக்காக

விரல் கொண்டு
மண்பறித்து மண்பறித்து
குளமாக்கி
நீர் நிரப்பினாய்
நீரின் பாசி வெளிச்சத்தில்
மூழ்கிப்போனது
கைகள் மட்டுமல்ல
இதயமும் சேர்ந்து

இருப்பு

இருக்கும் போது தெரிவதில்லை
இருப்பின் மகத்துவம்
இல்லாத போது தெரிகிறது
வெறுமையில் எல்லாம்
சொல்லிக்கொள்ள
ஒன்றுமில்லை
என்றான பின்
வெறுமனே
துடித்துக் கொண்டிருக்கிறது
இதயம்

சென்ரியு

இல்லை என்பதை
எவ்வளவு நாசுக்காய்
ஏழையின் சிரிப்பில் இறைவன்

கன்னித் தீவு கதையாய்
தொடரும்
ஊழல்

மூன்று வரி ஹைக்கூ
நீ நான்
நம் காதல்

அம்மா குழந்தை

எத்தனையோ விதங்களில்
முயற்சிக்கிறேன்
எல்லாவற்றையும்
ஒன்றுமில்லாமல் செய்கிறாள் அவள்.

யூகித்து யூகித்து
பூதாகரமாக்கி
மிரட்சிக்கொள்ள வைப்பதாய் எண்ணி
பகிரத பிரயத்தனம் செய்கையில்
ஓர் ஒற்றைப் புன்னகையில்
நீர்க்குமிழியாய் ஆக்கிவிடுகிறாள் அவள்.

ஒவ்வொன்றைப் பற்றியும்
ஒவ்வொரு நினைப்போடு
என் முயற்சிகள்.

எல்லாம் ஒன்றுமில்லாமல் ஆக்கும்
அவள் செய்கை.

கொஞ்சம் கொஞ்சமாய்
ஒவ்வொன்றிலும்
தோற்றுக்கொண்டிருக்கிறேன் நான்.

ஒன்றுமே இல்லாமல்
எளிமையாய் வெற்றி பெறுகிறாள் அவள்.

அம்மாவாய் இருந்தும்
குழந்தையாகிறேன்.
குழந்தையாயிருந்தும்
அம்மாவாகிறாள் அவள்.
என் பலவீனங்கள்
முழுதாய் அறிந்து நாளும்.

ஒன்று

ஒன்று

ஒன்றில் ஒன்று

ஒன்றோடு ஒன்று

ஒன்று

இருப்பதில்லை எப்போதும்

ஒன்று அதுவாகும்

ஒன்று இதுவாகும்

அதுவான ஒன்று

அல்லது

இதுவான ஒன்று

எதுவாகவும் ஆகும் ஒன்று

ஒன்று

ஒன்றாகவே இருப்பதில்லை

எப்பொழுதும்.

சட்டம் சடங்கு

எங்கும்

எவ்விடத்தும்

எல்லா தருணங்களிலும்

ஆள் தேடி

முகம் பார்த்து

தலை சொரிந்து

பல் இளித்து

வலைந்து நெளிந்து

குழைந்தே

காரியம் நடக்க...

அப்புறம்

என்ன மயித்துக்கு

சட்டம் சடங்கு

சொல்... நமக்கு.

கனவுகளுக்கு இடையில்...

கண் விழித்து

நீர் தெளித்து

பத்துப் பாத்திரம் தேய்த்து

காப்பி போட்டு

பிள்ளைகளை எழுப்பி

கால் தொட்டு வணங்கி

காப்பி தந்து

அவசர அவசரமாய்

சமைத்து

பள்ளி அனுப்பி

அலுவலகம் கை அசைத்து

சென்று திரும்பி

மீள இயங்கத் தொடங்கி

அவசர கதியில்

கழிந்து போகும் 

உன் வாழ்வு - 

எப்போதேனும்

காதல் குறித்து 

நினைக்கத் தோன்றின்

எமக்காகவும் 

கொஞ்சம் சி்ந்து

கண்ணீர்த் துளி!

பிறிதொரு பொழுதில்

ஒன்றுமில்லாமல்

சந்தித்துக் கொண்டோம்

சந்திப்புகளின் உச்சத்தில்

ஒருவருக்கொருவர்

என்றானோம்

நீ

ஒருவருக்கு

நான்

ஒருவருக்கு

என்றான பிறிதொரு பொழுதில்

சந்தித்துக் கொண்டோம்

ஒன்றுமில்லாமல்.

அம்மாவின் பேர்

பிறந்த

ஒரு மாதத்திற்குள்

எதிர்பாரா விபத்தில்

அப்பா இறந்துபோக

தரித்திரம்...

அதிர்ஷ்டமில்லா பொண்ணு ஆனாள்

உற்றார் உறவினர் எலலாருக்கும்.

பள்ளிக்கூடத்தில்

எல்லாவற்றிக்கும்

முதன்மையாய்

சற்றே துடுக்காய்

பேசியதால்

வாயாடியானாள்...

ஆசிரியர்

மாணவர் என்ற

பேதமேதுமின்றி.

வளர்ந்து பெரியவளானதும்

மணமுடிக்கையில்

அவனது

மனைவி என்றே

அடையாளப்படுத்தப்பட்டாள்

ஊராரால்.

பிள்ளைகள் ரெண்டு

பிறந்த பின்னர்

அவர்களின் பெயரால்

அம்மா ஆனாள்

காலம் கடந்து

மரணத்துப் போனாள்

ஓர் நாள்

இறந்த அம்மாவின்

பெயர் அறிய 

நினைத்த பிள்ளைகள்...

தெரிந்துகொள்ள முடியுமோ?

அவளின் அப்பா

தன் கொள்கைப் பிடிப்போடு

மகளுக்கு வைத்த

“அஜிதா” என்ற பெயரை.