காத்திருப்பு

ஏதேனும் ஒன்று
காத்திருக்கிறோம்
வரப்போகும்
பேருந்திற்காய்

சிலருக்கு
அவசரமாய்
போயே தீரவேண்டிய காரியம்
சிலருக்கு
பொழுதுபோக
திரையரங்கிற்கு
இன்னும்
சிலருக்கோ
மகிழ்வுகருதியோ
அன்றி கவலைமறக்கவோ
மதுக்கூடமாய்
இருக்கலாம்

பெண்பார்க்க
பிள்ளை வீட்டார்
இலலை
ஓடிப்போக
உதவும் நட்பு

அலுவலகப்பணி
மருத்துவமனை
கோவில் குளம்
இத்தியாதிகள்
இன்னும்
எத்தனையோ
காரணங்கள் அவரவர்களுக்கு

பேருந்து வந்ததும்
முண்டியடித்து
தொங்கும் கூட்டத்தோடு
கூட்டமாய்
ஏறமுடியாதவர்

மீள
காத்திருக்கிறார்கள்
மனதிற்குள்
வேண்டியபடி
அடுத்தப் பேருந்தேனும்
வரவேண்டும்
காலியாய்...

தெரிந்தும்தெரியாதது

உங்களை
எஙகேயோ பார்த்த மாதிரி
எங்கே... எப்போ என்றுதான்
சட்டென்று  நினைவுக்கு வரல
முன் பின் பார்த்திரா விட்டாலும்
சொல்ல வேண்டி வந்தால்
சொல்கிறோம்

நெருங்கிப் பழகி
எல்லாம் தெரிந்திருந்தாலும்
ஒன்றுமே
தெரியாததுபோல்
முகம் மறைக்கிறோம்

தெரிந்தது தெரியாததுமாய்
தெரியாதது தெரிந்ததுமாய்
நகர்த்துகிறது
வாழ்க்கை.

கனவுபட்டாம்பூச்சி

எப்போதும்

முன்பறந்து

முன்பறந்து

மனம் மயங்கும் வேளை

வாகன மோதலில்

மடியுமென்

கனவு

பட்டாம்பூச்சி

பிடித்துப்போதல்

சின்ன வயது முதற் கொண்டே
தெரியும் மொழியாளை
மொழியாள் என்றால்
தேன் மொழியை
ஒன்றும் முத்துப் பல்
வரிசையில்லை
இருந்தும் அழகுதான்
அவள் சிங்கிப் பல்ரெண்டும்.
சிட்டுக் குருவியின் கூடுபோல்
சின்னதென்றாலும்
ஓரழகுண்டு
அவள் ஜிட்டுக்குடுமிக்கு
இருட்டுக்கும் வெளிச்சமுண்டு
அவள் கருவிழி கண்ட பின்
வந்த தெளிவு.
அது சரி
இப்படி இப்படி
எமக்கு பிடித்திருக்கு
அவளை அழகென்று
அவளுக்குப் பிடிக்க வேண்டுமே
இதுபோல்
என்னை.

எப்படிச் சொல்ல

யார் யாருக்கெல்லாம்
தம்பி பாப்பா
இருக்காங்க
வர வருஷம்
நம்ம ஸ்கூல்ல
எல்.கே.ஜி - முதல் வகுப்பு
சேக்குற மாதிரி
கை தூக்குங்க
பாக்கலாம் என்ற
மிஸ்சிடம்
எப்படிச் சொல்ல...
கல்யாணச் சந்தையில்
அதிக விலைகொடுத்து
மாப்பிள்ளை வாங்கும்
பேரத்தில்
வயதாகிப்போன
அம்மாவுக்கு
நான் பிறந்ததே
பெரிய விஷயம் என.

இப்படிக்கு மக்கள் பிரதிநிதி

மகாசனங்களே
ஊரில்
மழை பெய்கிறதோ
இல்லையோ


நான்
மக்கள் பிரதிநிதி
மந்திரி

மாதம்
மும்மாரி பெய்வதாகத்தான்
நாளும்  கூறுவேன்

நீங்கள்
சாப்பிடுகிறீர்களோ
இல்லையோ

மூன்றுபோகமும்
விளைச்சல்
விளம்பரப்படுத்துவேன்

இன்னும்...இன்னும்
எதுவாய் இருப்பினும்

ஆட்சிபற்றி
கேட்டால்
மக்கள் தொண்டே
மந்திரியின் வேலை
தம்பட்டம் அடிப்பேன்

நீங்கள்
மகிழ்கிறிர்களோ
இல்லையோ

நான்தான்
மக்கள்
பிரதிநிதியாயிற்றே

எல்லாரும்
மகிழ்ச்சியில்
திளைப்பதாகவே
அறிக்கைவிடுவேன்.



* ஒரு ரூபாயில் ஐந்து ரூபாயில் மக்கள் வயிறாற உண்பதாய்ச்சொன்ன அமைச்சர் பெருமக்களுக்கு சமர்ப்பணம்

முரண்பாடுகள்

எங்கள்
தலைக்கு எண்ணெய் இல்லை
தினமும்
தலைக்கு குளிக்கிறோம்
பக்தி போர்வையில்

எங்கள்
பாதங்களுக்கு செருப்பு இல்லை
ஆனால்
போட மறுப்பதாய் அடம்பிழடிக்கிறோம்
கடவுள் பெயரால்

எங்கள்
பசிக்கு உணவுதான் இல்லை
இருந்தும்
விரதமிருப்பதாய்ச் சொல்லி
கௌரவப் படுத்துகிறோம்

எங்கள்
மனித நேயங்கள் வளரவில்லை
தெய்வங்களின் புகழுக்காய்
புராணங்கள் எழுதுகிறோம்

வேறுபாடு

அன்று
நிலவை அழைத்தாவது
சோறு ஊட்டிய
அன்னை
இன்று
என்னையே
அழைக்க
மறுக்கிறாள்...

பித்து

நேற்று அது
அதற்கு முன்
வேறொன்று
இன்று இது
நாளை...?

எதைப்
பற்றி இருக்குமோ
மனப்
பித்து

கொடு

இனியும்
உன்னிடம் பேச
எதுவுமில்லை எமக்கு
பேசி எதுவும்
விளையவில்லை என்பதாலில்லைஸ
இனி பேசுவதால்
எதுவும் விளையப் போவதுமில்லை

நான்
பேச வேண்டியவர்கள்
அதோ வெளியில்
சிதறிக்கிடக்கிறார்கள்
அவர்களிடம்
பேசப்போவது
உன்னிடமிருந்து “கொடு”
என கேட்பதற்கில்லை
“எடு” என சொல்வதற்கு