நிரூபணம்

நடிகர்கள் தலைமையில் ஆட்சி
நிரூபணம் ஆனது
கண்ணீர் மல்க பதவி ஏற்பு

மறுபடி பிறப்பேன்

நீங்கள்தான்
முடிவுசெய்ய வேண்டும்
ஏனெனில்
முடிவுசெய்யுமிடத்தில்
நீங்கள்தான்
இருக்கிறிர்கள்...

நாடு கடத்தலாம்
நாடு கடத்த ஏதுவாக
தேச துரோக
குற்றம் சுமத்தலாம்.

கைது செய்யலாம்
விசாரணை ஏதுமின்றி
கைது செய்ய
குண்டர் சட்டத்தில் கைது
என்றும் கூறலாம்.
வெளியில் வராதபடிக்கும்
உதவியாய் இருக்கலாம் அது.

தூக்கில் போடலாம்
பொது அமைதிக்கு
பங்கம் விளைவித்ததாய்
அறிக்கை விடலாம்

கொஞ்சம் சந்தேகம்
வருமென்றால்
உள்ளிருப்பிலேயே
துப்பாக்கியின்
தோட்டா தீரும்வரை
சுட்டுத்தள்ளலாம்
தப்பிக்க முயற்சித்ததாய்
சமாதானம் செய்யலாம்

எதைச்செய்தாலும்
ஒன்றை
நினைவில் கொள்ளுங்கள்
எம்மக்களுக்கான
வாழ்வும் உரிமையும்
முழுதாய் கிடைக்கும் வரை
மறுபடி மறுபடி
பிறப்பேன் என்று

கலகக் குரல்

பேசலாம் என்றார்கள்
பேசினேன்
என் மக்களிடம்
அவர்கள்
அறியாதிருப்பதை
அறிந்துகொள்ள வேண்டியதை
நிறுத்து - இது
கலகத்தின் குரல்
என்கிறார்கள்.

எழுதலாம் என்றார்கள்
எழுதினேன்
எங்கள் மக்களின்
அவலங்களை
அவஸ்தைகளை
எழுதுகோலை
பிடிங்கி எறிந்தார்கள்
எழுதாதே - இது
எதிர்முனை செய்தி
என்கிறார்கள்.

பாடலாம் என்றார்கள்
பாடினேன்
எஙகளின்
தேவைகளை
உரிமைகளைக் குறித்து
குரல்வளை நெறிக்கிறார்கள்
என் குரல்
ஒன்று ஒப்பாரியாகவோ
போர் பரணியாகவோ
ஒலிக்கிறதென்கிறார்கள்.

என்னைப் பேசச்சொன்னால்
என்னை எழுதச் சொன்னால்
என்னைப் பாடச்சொன்னால்
வேறென்ன பேச
வேறென்ன எழுத
வேறென்ன பாட

என்மக்கள் இன்னும்
உரிமையற்ற மனிதர்களாய்
வாழும் வரையில்
அதைப் பற்றி
பேசாது எழுதாது பாடாது....
அது வரை
என் குரல்
கலகத்தின் குரல்தான்....

ஊழல்

முள்ளை முள்ளால் எடு
வாக்களித்தனர் வாக்காளர்கள்
ஊழலுக்கு எதிராய் வேறொரு ஊழல்

வரிசை

ஒன்று இரண்டு மூன்று
எந்த வரிசையென்றாலும்
கடைசியில் தான் பெண்கள்.